Group 1/Group 2 Interview – Demonetisation – పెద్దనోట్ల రద్దు – పర్యవసానాలు

Demonetisation in Telugu, పెద్దనోట్ల రద్దు

పెద్దనోట్ల రద్దు – పర్యవసానాలు:

గ్రూప్ 1 మరియు గ్రూప్ 2 ఇంటర్వ్యూలకు ప్రిపేర్ అయ్యే అభ్యర్థులకు పెద్దనోట్ల రద్దు దాని పర్యవసానాలు ప్రిపేర్ అవ్వాల్సిన ఒక ముఖ్యమైన అంశం. ఈ పెద్దనోట్ల రద్దు పై అభ్యర్థులను ఇంటర్వ్యూలో ప్రశ్నలు అడిగేందుకు ఎంతో ఆస్కారం వుంది. కనుక ఈ పెద్ద నోట్ల రద్దు గురించి, దాని చరిత్ర, ఆర్ధిక వ్యవస్థపై దాని ప్రభావాలను మీకు అందిస్తున్నాము

నోట్ల రద్దు అంటే?

  • ఇప్పటివరకు లీగర్ టెండర్‌గా వాడుతున్న కరెన్సీని వెనక్కి రప్పించి, దాని స్థాయిని మార్చడమే నోట్లరద్దు అంటారు.
  • ఇలా లీగల్ టెండర్‌ను నోట్లరద్దు కానీ, తిరిగి తీసుకోవడం కానీ, తీసేయడం కానీ చేసిన తర్వాత ఆ నోట్లు చెల్లుబాటు కావు. ఆ కరెన్సీ నోట్లను మళ్లీ వాడటానికి వీలు లేదు. ప్రపంచవ్యాప్తంగా ఉన్న వివిధ జాతీయబ్యాంకులు/కేంద్రబ్యాంకులు సాధారణంగా పాత కరెన్సీ నోట్లను, పాడైన నోట్లను వెనక్కి తీసుకొని, మరింత భద్రతాపరమైన చర్యలతో మళ్లీ విడుదల చేస్తుంటాయి.

నోట్ల రద్దు ఎందుకు?

ముఖ్యంగా పెద్ద నోట్లతో జరుగుతున్న నల్లధన లావాదేవీలను, సమాంతర ఆర్థిక వ్యవస్థను ఆపడానికి, చట్టబద్ధ ఆర్థిక లావాదేవీలను ప్రోత్సహించడానికి తీసుకున్నారు. దొంగ నోట్లు, మాఫియాను, ఉగ్రవాద కార్యకలాపాలను, చట్ట వ్యతిరేక లావాదేవీలను నిరోధించడానికి తీసుకున్న నిర్ణయం.

భారతదేశంలో పెద్ద నోట్ల రద్దు:

  • 2016 నవంబర్ 8న భారత ప్రభుత్వం తీసుకున్న నిర్ణయం వల్ల రూ. 500, 1000 నోట్లు చెల్లకుండాపోయాయి.
  • పాత నోట్లను బదిలీ చేసుకోవడానికి 2016 డిసెంబర్ 30 వరకు గడువు ఇచ్చారు.
  • కొత్త రూ. 500, 2000 నోట్లను ఆర్‌బీఐ విడుదల చేసింది.

భారతదేశంలో నోట్లరద్దు చరిత్ర

  • స్వాతంత్య్రానంతరం జరిగిన రెండో నోట్లరద్దు. స్వాతంత్య్రానికి పూర్వం కూడా నోట్లరద్దు జరిగింది (1946).
  • 1978 మొరార్జీ దేశాయ్ ప్రభుత్వంలో రూ. 500, రూ. 1000, రూ. 10000 నోట్లను రద్దు చేశారు. (నోట్లరద్దుపై సెంట్రల్ బోర్డ్ ఆఫ్ డైరెక్ట్ టాక్సెస్ (CBDT) ఇచ్చిన రిపోర్ట్ ప్రకారం) కేవలం 15 శాతం పెద్ద నోట్లను రద్దు చేసే నిర్ణయం ఇది.
  • పెద్ద నోట్ల లావాదేవీల్లో అవకతవకలను నిరోధించడానికి ఉన్న నోట్లరద్దు చట్టం-1978 వల్ల ఎలాంటి ఉపయోగం లేకుండా పోయింది.
  • నోట్లరద్దు అనేది నల్లధనాన్ని తగ్గించడానికి, సమాంతర ఆర్థిక వ్యవస్థను నిరోధించడానికి అంతిమ పరిష్కారం కాదని పేర్కొంది.
  • ప్రస్తుతం యూరోపియన్ కేంద్ర బ్యాంక్ కూడా 500 యూరో నోట్లను రద్దు చేయాలని నిర్ణయించింది.

నోట్లరద్దుతో ఆర్థిక వ్యవస్థకు సవాళ్లు

  • ఆర్‌బీఐ రిపోర్ట్ ప్రకారం దేశంలో 87% లావాదేవీలు నగదు రూపంలోనే జరుగుతాయి. ఎందుకంటే ఏటీఎంలు, బ్యాంకింగ్ ఇన్‌ఫ్రాస్ట్రక్చర్, స్వైపింగ్ మెషీన్‌లు అత్యధికంగా పట్టణ ప్రాంతాల్లో మాత్రమే నెలకొల్పి ఉండటం, ఆర్థిక నిరక్షరాస్యత పన్ను చెల్లింపుల నుంచి తప్పించుకోవాలనే ఉద్దేశం, నల్లధన లావాదేవీలు ఎక్కువ మొత్తంలో ఉండటం వల్ల 87శాతంపైగా లావాదేవీలు నగదు రూపంలోనే జరుగుతాయి.
  • 2015-16 ఆర్థిక సర్వే ప్రకారం 27 శాతం గ్రామాలు మాత్రమే బ్యాంకింగ్ వ్యవస్థను కలిగి ఉన్నాయి. కాబట్టి పూర్తిస్థాయిలో బ్యాంకింగ్ వ్యవస్థను ఏర్పాటు చేయాలంటే భారీ మొత్తంలో మౌలిక సదుపాయాలను కల్పించాలి.
  • కొత్తగా ప్రవేశపెట్టిన రూ. 2000 నోటును చిల్లరగా మార్చాలంటే కష్టంతో కూడుకున్న పని. దినసరి లావాదేవీలన్నీ రూ. 500 కంటే తక్కువ మొత్తంలోనే జరుగుతాయి.
  • భారీ స్థాయిలో నమోదయ్యే డిజిటల్ లావాదేవీలను నియంత్రించడానికి పటిష్టమైన వ్యవస్థను ఏర్పర్చి హ్యాకర్ల బారిన పడకుండా చేయాలి.

వివిధ రంగాలపై ప్రభావం

  • సమాంతర ఆర్థిక వ్యవస్థ: పెద్ద నోట్లరద్దుతో భారీ స్థాయి లావాదేవీలు తగ్గి, చట్టేతర, హవాలా లావాదేవీలు తగ్గుముఖం పట్టొచ్చు.
  • మనీ సర్క్యులేషన్‌: స్పల్పకాలంలో మనీ సప్లై తగ్గే అవకాశం ఉంది. కొత్తనోట్లు అధిక మొత్తంలో విడుదలైతే అది నియంత్రణలోకి వస్తుంది.
  • డిమాండ్‌: వినియోగదారుల వస్తువులపై రియల్ ఎస్టేట్, గోల్డ్, విలాస వస్తువులు, ఆటోమొబైల్ మొదలైన రంగాల్లో డిమాండ్ తగ్గి వ్యాపారం మందగించే అవకాశం ఉంది.
  • ధరలు: వ్యవసాయం, దాని అనుబంధ రంగాలు, చిన్న వ్యాపారులు, చిన్న మధ్యతరగతి పరిశ్రమలు, సేవలు, గృహరంగం మొదలైన వాటిలో ధరలు తగ్గి ద్రవ్యోల్బణం తగ్గే అవకాశం ఉంది.
  • జీడీపీ: వినియోగ వస్తువులపై డిమాండ్ తగ్గి తయారీరంగం వృద్ధి పడిపోతుంది.
    -జీడీపీలో రుణాత్మక వృద్ధి నమోదు కావచ్చు.
    -ప్రపంచ రేటింగ్ సంస్థలు భారత వృద్ధి రేటును తగ్గించవచ్చు.
    -గతేడాది జీడీపీ వృద్ధిరేటు 7.6 నుంచి 2 శాతం వరకు తగ్గి 4 నుంచి 5 మధ్యలో ఉండవచ్చు.
    -మాజీ ప్రధాని మన్మోహన్‌సింగ్ అభిప్రాయం ప్రకారం 2 శాతం వరకు జీడీపీ తగ్గవచ్చు.
  • బ్యాంకింగ్ రంగం: ఎక్కువ మొత్తంలో డిపాజిట్లు నమోదై బ్యాంక్‌లలో నగదు పెరిగి, ఎక్కువ మొత్తంలో తక్కువ రేటుకు లోన్లు ఇవ్వవచ్చు.
    -ఆన్‌లైన్ లావాదేవీలు పెరుగుతాయి.
  • డిజిటల్ లావాదేవీలు, E-వ్యాలెట్‌లు, క్రెడిట్ కార్డులు మొదలైనవి వృద్ధి చెందుతాయి.
  • గ్రామీణ ఆర్థిక వ్యవస్థ చిన్నాభిన్నమై, వస్తువులకు గిరాకీ తగ్గి మొత్తం ఆర్థిక వ్యవస్థ కూలిపోయే ప్రమాదం ఉంది.
  • నోట్లరద్దు కంటే ఇతర వ్యవస్థాగత మార్పులతో నల్లధనాన్ని నిర్మూలించవచ్చు. నల్లధనాన్ని చట్టబద్ధంగా మార్చే ప్రక్రియలో మరింత అవినీతి జరుగుతుంది. దీనివల్ల దీర్ఘకాలంలో దేశ ఆర్థిక వ్యవస్థకు తీవ్ర నష్టం వాటిల్లే అవకాశం ఉంది.

నోట్లరద్దుతో లాభాలు

  • నల్లధనం నిర్మూలించబడుతుంది. దీంతో ద్రవ్యోల్బణం నియంత్రణలోకి వస్తుంది.
  • ఉగ్రవాద కార్యకలాపాలు, చట్టవ్యతిరేక లావాదేవీలు, ఇతర మాయాజాల లావాదేవీలు నిర్మూలించబడుతాయి.
  • నకిలీ నోట్లు నిర్మూలించబడుతాయి.
  • ప్రభుత్వానికి పన్నులు చెల్లించడం వల్ల ప్రభుత్వ ఆదాయం పెరుగుతుంది.
  • రియల్‌ఎస్టేట్ రంగం, స్థిరాస్థుల విలువ తగ్గుతుంది. క్యాష్‌లెస్ ఎకానమీ పెరుగుతుంది.
  • ద్రవ్యలోటు తగ్గే అవకాశం ఉంటుంది.
  • దీంతో మొత్తం లావాదేవీలు చట్టబంద్ధంగా జరిగే భారత ఆర్థిక వ్యవస్థ సక్రమమౌతుంది. తద్వారా ఆర్థిక వ్యవస్థలో వ్యవస్థాపరమైన మార్పులు సంభవిస్తాయి.

నగదురద్దుతో నష్టాలు

  • నల్లధనం కేవలం కరెన్సీ రూపంలోనే ఉండదు. కాబట్టి పూర్తిగా నిర్మూలించబడే అవకాశం లేదు.
  • సామన్యమానవునికి ఎన్నో ఇబ్బందులు ఎదురవుతాయి. దానివల్ల చిల్లర వర్తకం చేసుకునే వ్యాపారాలు తీవ్రంగా నష్టపోవడమే కాకుండా, అవ్యవస్థీకృత ఆర్థిక వ్యవస్థ చిన్నాభిన్నమవుతుంది.
  • నకిలీ కరెన్సీల వ్యాపారం ఊపందుకుంటుంది.
  • కరెన్సీ అతి నియంత్రణలో ఉంటుంది కాబట్టి రూరల్ డిమాండ్ భారిగా తగ్గిపోయే ప్రమాదం ఉంటుంది.
  • డిమాండ్ తగ్గిపోవడంతో వస్తువులకు గిరాకీ తగ్గి, ఉత్పత్తిలో తగ్గుదల సంభవించడంతో ఉద్యోగాల్లో కోతవిధించే అవకాశం ఉంటుంది.
  • 2008లో అమెరికాలో వచ్చిన సబ్‌ప్రైమ్ క్రైసిస్ లాగా డిమాండ్ తగ్గిపోయి మాని సర్క్యులేషన్ క్షీణించి ప్రతి ద్రవ్యోల్బనం రావొచ్చు. తద్వారా ఆర్థిక వ్యవస్థ సంక్షోభంలోకి నెట్టబడి అస్థవ్యస్థం అవ్వోచ్చు.

Comment here!